სტრესის ფონზე საკვები ენერგიად ვერ იშლება და მარაგის სახით ცხიმში გადადის
თარიღი: 06 აპრილი, 2023
წონაში სულ მცირე მატებაც კი, ჭარბწონიანობაზე სულ რომ არაფერი ვთქვათ, ხშირად ხდება ადამიანებისთვის შფოთვის მიზეზი. ყველა ერთხმად ვთანხმდებით, რომ ორგანიზმისთვის ჯანსაღად კვება აუცილებელია, თუმცა კვების გარდა სხვა ფაქტორებიც ახდენს გავლენას წონის მატებაზე და კლებაზე. მაგ. ნერვიულობა და სტრესი. რეალურად ნერვიულობა გახდომას უწყობს ხელს თუ წონაში მატებას? ამ და სხვა მნიშვნელოვან კითხვებზე გვპასუხობს ენდოკრინოლოგი მზია ფიცხელაური:
ნერვიულობა, ნებისმიერი მომატებული ემოციურობა, დადებითი იქნება ეს თუ უარყოფითი, მოქმედებს მადაზე. ინდივიდუალურ ნივთიერებათა ცვლაზეა დამოკიდებული, რაც უწყობს ხელს წონის მომატებს ან გახდომას. როგორც წესი, ამას მარტივად ვხედავთ. ზოგს ემატება მადა, ზოგი ვერ იღებს საკვებს და ვერც სითხეს... იმ შემთხვევაში, როცა საკმარისად არ ვიკვებებით, გამოფიტვის ხარჯზე ხდება წონის დაკარგვა. ეს არ არის ჯანსაღი კლება, როგორც კი გადაივლის სტრესი, მარტივად შეიძლება ორმაგად მოიმატოს ადამიანმა წონაში, რაც ასევე არაჯანსაღია. ორგანიზმი, რომელიც არის მიდრეკილი ჰორმონალური დარღვევებისკენ, სტრესის ფონზე ბლოკავს გარკვეულ ჰორმონებს, შესაბამისად, მიღებული საკვები ვერ იშლება, როგორც ენერგია და გადადის მარაგის სახით ცხიმში. რეალურად ორგანიზმი რჩება მშიერი და მუდმივად ითხოვს კვებას.
როგორ უნდა დავძლიოთ სტრესის დროს მომატებული მადა, ან უმადობა?
სტრესთან გამკვლავება მარტივი არ არის, როგორც წესი, დროულად ვერ ფასდება მდგომარეობა. ორივე შემთხვევაში უნდა მიმართოთ ექიმს და არ მიიღოთ თვითნებურად წამლები. ინდივიდუალური კონსულტაციის შედეგად დაგენიშნებათ მკურნალობის კურსი.
როცა საქმე წონის მატებას ეხება, პურს უფრთხიან, მის ნაცვლად უსაფუარო თხელი ლავაშის ჭამა ჯობია?
პური, გარდა იმისა, რომ მაღალკალორიული პროდუქტია, ასევე არის საკმაოდ ღირებული საკვები. თვითნებური შეზღუდვა არ შეიძლება და ვერც თხელი უსაფუარო ლავაშით ჩავანაცვლებთ. შესაძლებელია ორივე პროდუქტის მიღება. ორივე მათგანი ყველაზე მნიშვნელოვანი B ვიტამინის წყააროა და გვჭირდება ყოველდღიურად.
სტრესის და ნერვიულობის დროს ყავას და შოკოლადს მიირთმევენ, ეწევიან დიდი რაოდენობით სიგარეტს. რა უნდა გავითვალისწინოთ მათი მიღებისას?
თუ საქმე გვაქვს ჰორმონულ დარღვევასთან, რაც მეტი რაოდენობით ტკბილეულს და დაშაქრულ ყავას მივიღებთ, ყველაფერი გადავა ცხიმში და უჯრედს ენერგიას არ მისცემს. უშაქრო ყავა და სიგარეტი იწვევს გასტრიტს და მსგავს გართულებებს, საბოლოოდ კი კუჭ-ნაწლავის სისტემა გაგვიხდება სამკურნალო.
წყარო: https://www.beaumonde.ge